Mamlaka za Iran zimethibitisha kuiachia meli ya mafuta Talara, yenye bendera ya Marshall Islands, ambayo ilikamatwa na Jeshi la Walinzi wa Mapinduzi ya Kiislamu (IRGC) karibu wiki moja iliyopita katika Mlango wa Bahari wa Hormuz.
Kwa mujibu wa taarifa kutoka Columbia Shipmanagement, kampuni inayoisimamia meli hiyo, Talara iliondoka katika maji ya Iran mapema asubuhi ya Jumatano, ikiwa na wafanyakazi wake 21 wote wakiwa salama. Kampuni hiyo imesema haikuhitajika kutoa dhamana yoyote kwa ajili ya kuachiliwa kwa meli hiyo.
Iran ilikamata Talara tarehe 14 Novemba, ikidai kuwa meli hiyo ilikuwa inabeba takribani tani 30,000 za kemikali za petroli ambazo ilizitaja kuwa “mzigo usioidhinishwa kisheria”.
IRGC ilieleza kuwa meli hiyo ilikamatwa kufuatia maagizo ya mahakama ya Iran, hatua ambayo mara nyingi Iran huitumia katika migogoro ya baharini ili kuhalalisha kukamata meli za kigeni.
Mashirika ya habari ya kimataifa yameripoti kuwa kukamatwa kwa meli hiyo ni sehemu ya mvutano wa muda mrefu katika Ghuba ya Uajemi, eneo nyeti linalosafirisha zaidi ya theluthi moja ya mafuta duniani, na ambako Iran imekuwa ikikamata meli mara kwa mara kwa madai ya kukiuka sheria zake za usafirishaji.
Kuachiliwa kwa meli hiyo kunapunguza kwa muda mvutano katika Mlango wa Hormuz, ambao mara kwa mara huongezeka wakati Iran inapokamata meli za mafuta.
Wachambuzi wanasema uamuzi huo unaweza kuwa jitihada za Iran kutuliza mazingira ya kidiplomasia, hasa wakati mataifa ya Magharibi yanaendelea kuiwekea vikwazo. Hata hivyo, tukio hilo linaacha onyo kwa meli za kibiashara zinazosafiri katika eneo hili — kwamba Iran bado ina athari kubwa katika usalama wa baharini.
Katika miaka ya karibuni, Iran imekamatwa meli kadhaa katika Mlango wa Hormuz, mara nyingi ikidai ukiukwaji wa sheria za baharini au mizigo haramu. Hii imekuwa ikisababisha wasiwasi mkubwa kwa kampuni za meli na serikali zinazotegemea njia hii muhimu ya mafuta.